韓農連日在灣仔和銅鑼灣為反世貿示威，在灣仔更與警方爆發多次衝突，無綫昨日食住示威熱潮，安排湯盈盈飾演的李笑好踩入銅鑼灣拍韓語短劇。而眾藝人對反世貿示威亦各持己見，譚詠麟撐警方處理恰當，at17則同情農民。
韓國農民連日聚集灣仔及銅鑼灣為反世貿示威，更在灣仔與防暴警察爆發多次武力衝突，引起廣泛關注，無綫方面看準這話題，昨日安排湯盈盈、宋芝齡和李家聲分別到銅鑼灣和灣仔拍攝《笑口常開》，更在銅鑼灣街頭用韓語演出短劇，擺明諷刺反世貿事件。
「警察都有阿媽生」
談到反世貿示威，湯盈盈說：「佢哋唔咁樣做就唔會引起關注，佢哋只係想表達民意，但警方亦處理得好好。」李家聲則說：「算係諷刺時弊，提番少少世貿搞亂香港嘅嘢。」監製林嘉穎更稱其中一幕會於茶餐廳拍攝，屆時會用胡椒粉做話題，影射警方用胡椒噴霧。
對於連日來的示威衝突，藝人亦大表關注，不過聲音各異。譚詠麟（阿倫）前晚在澳門演出，他表示日前原本約曾志偉到銅鑼灣飯局，但因灣仔和紅隧封路，臨時改往尖沙嘴，故遲到個多小時。他又說：「香港警方做得好好，冇好暴力，如果喺外國，啲人一早就俾警察扑爆頭，香港警方已經好和平同人道，冇一早用水炮噴啲人，如果唔係啲人實凍死。示威者想抒發心中意願，但警察都有阿媽生，唔係一出世就俾人打。」
阿倫又說：「陳日君話警方今次做法係香港之恥，佢咁講我好反感，佢過份投訴，我唔覺警方濫用暴力，警方只係維持香港秩序，事前警方畀足指示，係佢哋唔跟指示去做，人哋先至採取行動啫。警方喺嗰個時候拉人，我覺得冇問題。」
at17同情農民
而曾到非洲加納出席「貿易要公平」活動的at17成員盧凱彤（Ellen）前晚則力撐韓農暴力有因，她說：「我見到示威者推警車同打警察時好心痛，我唔可以批評佢哋咁做係啱定唔啱，因為多年貧窮會促使呢種暴力，佢哋有好多人都餓死，如果你睇到身邊人係咁樣餓死，你都可能會有呢種憤怒，不過點都好，我希望用和平方法解決。」
採訪、攝影：王崇穎、胡比
