《水滸傳》有個洪太尉，所謂「遇洪而開」，放出一百零八條好漢，特區就有個陳四萬同陳日君，兩陳一出，泛民二十五條友就得救喇。
君不見，陳太見步行步，噚朝早過煲呔call咗個記招，要求煲呔答應港人要向中央反映，最遲二○一二年有普選。嘩，真係聲勢過人。
而陳主教就更厲害，前晚深夜去到世貿示威場地為韓農打氣，不值警察欺負弱小，當然主教唔係贊成暴力，只佢對警方做法有好大意見。之後佢老人家重去到觀塘裁判法院尋人，一個人企喺門口，非常堅持，八方見佢衣着好單薄，但係佢一啲都唔畏縮，真係寫個服字。
主教企到成點幾鐘都唔走，八方問佢平日呢個鐘數係咪已經瞓咗，佢笑一笑，話一般好夜都未瞓。煲呔遇上個咁出位同敢言嘅主教以及舊上司，真係冇覺好瞓咯。
傳真︰2623-9278
電郵︰[email protected]