薛凱琪（Fiona）多年前獲父親送贈北京混西施的小狗冬冬，小狗跟主人不單扁嘴時的神情非常相像，還同樣有鼻敏感。原本Fiona跟愛犬感情甚佳，但自從加入樂壇後已無暇打理愛犬，故冬冬早已另投薛媽媽懷抱。
薛凱琪飼養的北京混西施狗仔冬冬，今年八歲，十分百厭，但最叻睇眉頭眼額，本來Fiona跟牠最好感情，可是自年前加入樂壇後因工作不絕，無奈地疏忽了冬冬，故愛犬轉軚投向薛媽媽懷抱，成為家中頭號寵兒，更掉轉槍頭欺負Fiona。
恰主人又咬又吠
日前Fiona帶冬冬到其北角半山寓所附近散步，小狗體形細細聲大大，又不聽Fiona話，幸好Fiona的媽咪在場控制大局，冬冬才肯上鏡。
Fiona說：「我爹哋、媽咪得我一粒女，佢哋驚我悶，又知我鍾意小動物，有次成家人喺銅鑼灣一間寵物店見到冬冬，我哋三個都鍾意佢，佢又好黐我，爹哋就准我買返屋企。佢曳到爆，又好聰明，但𠵱家佢恰我呀，錫媽咪、驚爹哋，可能我成日唔喺屋企，一返去就吠我㗎。我同佢玩掟波，佢就以為我同佢搶玩具，咬我又吠我，過度活躍呀。」
與薛媽同床而睡
Fiona苦笑地說，現在冬冬最愛媽媽，母親亦很疼牠，她說：「冬冬當自己係家庭一分子，媽咪喺屋企擺佢嘅相多過我呀，佢同媽咪瞓嘅，重一定要瞓枕頭㖭。」
其實Fiona當初跟冬冬甚friend，她笑說：「冬冬同我好似，佢腰骨有事，上唔到樓梯，入行前我都有帶佢去海灘散步浪漫吓。我記得嗰時買佢返嚟，佢好多病痛，有鼻敏感，我又係長期鼻敏感流鼻水，不過佢𠵱家唔like我，除非爹哋、媽咪唔喺屋企，佢冇得揀至黐埋嚟。」
採訪：朱倬誼 攝影：葉君海
