上星期四，煲呔喺中環表演咗一個PoliticalStunt（政治特技），忽然帶領佢「內閣」嘅各局長及行政會議成員喺中環高調替民建聯支持政府政改方案嘅攤檔撐場。
特技表演之時本進士正身處十字路口（對唔住唔係政制十字路口，只係畢打街的十字路口）趕住同AO靚女飯敍，所以目擊整個「案發經過」。說句老實話，我當時真係嚇親，心裏暗罵邊個人送條「屎橋」害我偶像煲呔！
將自己同民建聯綑綁
其實，煲呔咁做確係笨拙，佢嘅高民望某程度同佢過往公務員嘅身份和相對較淡嘅親中色彩有關。咁樣撐場等於將自己同民建聯綑綁，亦將民建聯形象提升到變成執政黨一樣。其他政黨如自由黨喺周中亦有同類活動，厚此薄彼亦唔係政治上嘅上算！
另一方面，煲呔咁做亦畀人一個民主及保守兩大陣營「晒馬」嘅感覺，一方面強調泛民遊行人數並不重要，卻努力催谷簽名數字，咁只會將大眾嘅注意力帶回「何謂普遍市民支持的方案」，引發不必要嘅麻煩。要找出「普遍」的答案，只有靠公投，但如香港可以公投，雙普選根本唔係問題啦。難怪喺星期五嘅AO聖誕聚餐，AO們都笑他給陳太上街這件事迫得「狗急跳牆」。
本進士為咗抽出以「屎橋」送煲呔一程嘅真兇，經過多番明查暗訪，終俾我發現原來係曾鈺成。話說民建聯喺上星期二舉行中委會議，有人提出煲呔上街嘅建議，曾鈺成認為是「絕橋」，便向煲呔提議。咁睇嚟煲呔都幾信呢位同宗，佢徒弟李慧琼做特首助理都可能係真喎！
倔頭進士
傳真︰2623-9278
電郵︰[email protected]