後日立法會開始表決政改方案，如果每個議員都用盡啲時間講嘢，分分鐘都要講成廿幾三十粒鐘，要到星期四、甚至星期五先至投得票，不過有啲議員，好似金勞詹咁就一於少理，佢同八方講，已經買咗星期四晚嘅機票飛去美國放假。
除咗金勞詹，八方據聞周梁淑怡都係買咗同一日機票飛，八方問過周太求證，但佢就飛咗去留言。
金勞詹話，無論佢留唔留喺香港投票都好，總之佢一定係反對五號報告書，因為佢違反《基本法》。不過無論政改幾重要都好，都唔夠健康咁重要，金勞詹前幾日先去港安醫院做完「通波仔」手術，原來佢嗰兩條一大一細血管全部塞晒，之前照極都照唔到，差啲好似張鑑泉咁，無端端死咗都唔知乜事！
呢次手術費都幾貴，成個手術夾埋一晚住院，用咗金勞詹三十至四十萬，不過執番條命仔，畀幾多錢都係好值得啦，「我識飲識食，都知一定有事！」
至於呢種合磁共振技術，聽講只有養和同港安先有得做。
傳真︰2623-9278
電郵︰[email protected]