今個聖誕檔期真係好鬼熱鬧，中西猛片傾巢而出，陳可辛部《如果．愛》截至前日，上映咗十日約收八百九十萬，陳凱歌嘅《無極》三日約收百六萬，而彼德積遜（PeterJackson）嘅《KingKong》四日約收七百萬，成績好理想。
而《哈利波特火盃的考驗》（HarryPotterandTheGobletofFire）前日做特別場，一日上映三至四場，都收咗成百七萬，真厲害。《無》片喺香港雖然收得麻麻，但內地就報捷，話開畫三日就有六千萬票房，贏到開巷。
《時代》周刊勁讚
《如》片票房敵唔過隻猩猩王，但美國《時代》周刊寫咗篇影評讚呢部戲，話《如》片好精采，陳可辛呢部戲滿載流行動感，不失醉人情懷，影片入面嘅人物重有血有肉㖭，重話呢部亞洲片係絕對可以同任何一部有國際水平嘅戲相比。
