文化人睇經濟政策，往往只識從歷史角度出發，譏笑經濟學者不懂文化內涵，不明歷史，譬如陳雲講「農者天下之大本——農業貿易衝突的文化底蘊」（信報十二月十五日）就講到：「至於某些只懂得教科書內自由貿易的本地學者與評論人，對農業補貼與農政的理解，自是貧乏不堪」；文章結尾又話：「農業是浮華世界的『在地』之根，是國政的深密動力，而這卻是無家國觀念的某些香港人所不能想像的。」
文化人讀得古書多，講「農者天下之大本」，最啱就係在課室引經據典去講學或寫文章以示博學。現代經濟學者，研究農政與農業補貼者，不知凡幾，積累咗大量數據，知道國家之向前邁進，與「脫農」有關，把「農民綁在大地上」，係禍國之源。歷史上，中外皆有「重農主義者」（Physiocrat），西漢賈誼就力主「驅民歸農」，抑末以強本，本就係農業，末就係工商。法國十七世紀學者FrancoisQuesnay（1694-1774）與受佢影響嘅Turgot（1727-1781）認為土地先至係創造財富之源，工商業只能幫助財富流通，不能真正創造財富，極力主張回歸自然，增加農業生產。
古代科技唔係太發達，農業提供糧食，當然係國之根本，但到咗工業革命之後，農業已經唔能夠滿足人民所有需要。研究現代中國經濟走向衰頹，被外國拋離之原因嘅宋叙五先生，寫過一本書，講清代雍正皇就係「抑末強本」之人，討厭開礦，百分百偏重農業，殊不知當時中國人口膨脹，農田面積無法增加，農田經多年耕種之後，每畝生產力下降，中國人均生產總值當然隨之而下降，適逢歐洲工業興起，開始重工輕農，中國就冇法子唔落後於人。農者為天下之大本，係過時過氣之腐儒講法，凡有世界意識，有國家觀念者，皆須唾棄之。中國目前之要務係加速農業人口移往城鎮，釋放農民勞動力，並非將中國農民綁在祖宗農田上。