林文龍在無綫古裝劇《本草藥王》中扮演李時珍，醫術了得。這位冒牌醫神日前出巡到尖沙嘴一間中藥店，即席示範執藥，手勢利落。原來林文龍扮完李時珍後，從中學習了不少醫學常識，他每周都會服食中藥調理身體。林文龍更直言拍攝《本》劇時身心疲累，身體出現後遺症，出現不少白髮。
繼韓星李英愛主演，講述醫女奮鬥史的韓劇《大長今》大受觀眾歡迎後，最近無綫推出由林文龍主演的古裝劇《本草藥王》，該劇口碑和收視都不錯，林文龍在劇中扮演名醫李時珍，演繹他一生濟世為懷的故事。
拍劇學習醫理
林文龍日前以便服「出巡」中藥店，他即席示範執出治療風濕病的銀翹散藥方，他除了步驟清楚外，手勢亦純熟。
問到林文龍平時可有看中醫習慣？他說：「大約半年前，我開始搵中醫調理身體，中醫師話我係熱底，有虛火。有時開廠，加上開工唔夠瞓，當同事拎花生零食一齊食，我一食多過五粒就會喉嚨痛，又或者塊面出粒粒，萬試萬靈，中醫師根據我嘅情況，就建議我如果要開工就飲兩劑中藥，但唔使開工就兩星期飲一次，慢慢調理番個身體。」
按體質服中藥
當日看中醫時，林文龍獲悉自己熱底後，他即衝口而出問是否要吃黃芩調理，林文龍說：「中醫師好奇怪我點知要用黃芩入藥，其實因為有一集《本》劇劇情，我記得內容講過呢種藥可以清肺火。」林文龍清楚自己身體狀況後，他食療都開始懂得避重就輕，他說：「我熱底就唔可以用高麗蔘進補，反而可以多飲解熱嘅花旗蔘茶。」不過林文龍都明白中藥雖有調理作用，但要身體健康，必定要有均衡飲食和養成良好的生活習慣。
正所謂苦口良藥，林文龍飲用中藥時可要吃嘉應子送口？他說：「咁又唔使，我寧願趁熱一口氣飲，咁樣冇咁苦，又容易啲入口。」
做齊古今名醫
林文龍坦言《本》劇是他從演以來最辛苦的劇集，他說：「因為拍劇已經『飛紙仔』，劇本根據醫書編成，有時成段醫書，有啲字都唔識讀，我哋收到劇本都要搵助導同編審一齊查番個注音，加上嗰啲醫藥名稱好長，要記起上嚟都好困難吓。」林文龍表示拍畢《本》劇，他的身體都出現後遺症，他說：「因為花好多腦力去消化啲對白，我白頭髮都多咗。」
此外，林文龍早年拍攝無綫劇集《醫神華佗》，扮演中國一代名醫華佗，最近又參演時裝劇《法政先鋒》，扮演一名法醫，林文龍笑言：「真係古代同時代嘅醫生都做齊晒。不過我承認演員係要作多方面嘗試嘅，拍攝呢啲咁專業嘅角色，我從對白同劇本中都學到好多醫學常識，都算另一種得益。」
撰文：比華利 攝影：仇志德
場地提供：余仁生集團
