許志安噚日喺中環國際金融中心一間餐廳舉行加盟東亞唱片簽約記者會，老闆林建岳送咗一支價值八萬八千蚊嘅八六年紅酒畀佢，因為安仔係喺八六年入行。安仔手上面戴住一隻閃令令嘅Dewitt手表，佢話係由一個識咗好多年嘅圈外男性朋友所送嘅，價值過百萬喎。
Sammi神秘祝賀
唔少歌手錄咗一啲恭賀安仔嘅片段，當中有楊千嬅、李克勤、陳慧琳、蘇永康同埋韓紅等等，不過就冇鄭秀文（Sammi）份。事後安仔經理人郭啟華澄清今次安仔加盟絕非外間所指話由Sammi穿針引線，而且恭賀片段入面冇Sammi份係因為唔想將個焦點放咗喺呢件事上面，佢重話就算Sammi要恭喜安仔，都好秘密咁用自己嘅方法去溝通。
外間一直有傳安仔今次以千五萬元加盟東亞，不過佢就唔肯講實際係幾多錢，只係話一個令大家都舒服同滿意嘅價錢。對於再次同Sammi隸屬同一間公司，安仔話唔會刻意避忌同對方合作，如果個劇本或者首歌係適合兩個人去做嘅話，佢會照做。
