世貿會議開會究竟講乜東東，睇中文報紙就烏垂垂，多數係片面報道，絕大部份篇幅就去咗南韓農民示威，用圖片刺激感官，事實上，世貿會議以外嘅示威活動，只算係同場加映嘅卡通片，但中文傳媒就以「妹仔大過主人婆」嘅方法處理，日日畀我哋睇卡通，喂，套正本戲究竟講乜嘢呀？對唔住，唔記得咗播映㖭！
有乜辦法唔睇番英文報紙吖，《南華早報》日日有一份會議特輯，IHT日日有重點報道。學陶傑話齋，唔識英文，識少好多嘢。要自己仔女學好英文，睇英文報紙雜誌，最大嘅理由就在於此。
南早係十二月十五日刊登咗一個全版彩色廣告，來自一個叫做StandUpforSteel嘅美國組織，美國人有錢，反對世貿談判，唔使上街示威，一於用錢買廣告，聲言要保護「公平貿易法」，保護美國製造業，以免美國工廠樣貌將來只會在博物館出現。
南韓農民講公平貿易，美國鋼鐵業講公平貿易，法國農民講公平貿易，愛爾蘭工人講公平工作權利，人人都要世貿創製一個「公平貿易環境」。究竟何謂公平貿易（fairtrade）？學究可以講一大堆廢話，寫幾十萬字，拆穿了，公平也者，即係既得利益，本身利益，美國鋼鐵業要求中國韓國鋼鐵唔好便宜過美國鋼鐵，南韓農民要求禁止便宜外國米入口，愛爾蘭人要求非洲便宜橙留番畀非洲人食，唔好輸往歐洲，法國農民伸手板要歐盟「津貼」，攞得最多嘅法國農民之中，有摩納哥王子。嗱，你哋嘅貨物唔好入嚟我度，等我自己生產嘅貨物可以賣貴好多，就係叫做「公平貿易」嘞。如果個個國家都係咁，中國貨物就只好賣番畀十三億中國人，永遠追唔上外國嘅技術及經濟水平。
講公平貿易嘅人只係爭取對自己行業公平，對消費者絕不公平，對浪費本國珍貴資源，更不公平。公平貿易喎，近似禍國殃民，千祈唔好信。