上星期，班工程師聚餐，八方個老友都有參加，重請到冬冬出席，非常有面。
正當大家食得高高興興之時，忽然聽到冬冬講啲好嚴肅嘅題目──就係政改。吓！咁都得，食聯誼飯咋喎，都要聽高官硬銷政改方案，真係服咗煲呔團隊精神。
咁工程界立法會代表何鍾泰好醒目，話自己張票重未定點投，其實何生並非泛民嘅二十五友，煲呔已經點咗佢會支持政府，如果臨尾呢啲政府鐵票都話重未定，真係好大件事。
今次政改真係好好玩，當年《基本法》規定要改特首同立法會嘅組成同產生辦法，要三分之二立會成員通過，當時為咗要防止民主派玩嘢，所以有咁難寫到咁難，點知最後自食其果，連政府提嘅方案都分分鐘因為攞唔夠四十票而泡湯。
傳真︰2623-9278
電郵︰[email protected]