黃貫中：衞蘭有自己Style
「男仔我會揀側田，只係聽到佢把聲，就覺得佢唱歌應該好好，而且佢重識得作歌，所以係好有實力嘅。女仔我就會揀衞蘭，因為佢好有自己嘅style。組合實揀Soler啦！冇得解，同佢哋太老友。其實組合入面，佢哋真係算係突出嘅一隊，好有自己嘅風格，就算唔老友都係揀佢哋。」
雷頌德：Soler似兩個陳啟泰
「男仔揀側田，女仔揀Janice，佢哋嘅歌易聽，而且又睇得，實力遠遠拋離其他人。組合就係Soler，佢哋好有才華，而且覺得佢哋好得意，好似有兩個陳啟泰出現，唔好笑咩？」
黃偉文：側田把聲香港冇
「側田把聲係𠵱家香港樂壇冇嘅，佢係香港人，但唱歌方法同把聲，都好有黑人嘅感覺，係樂壇一個新元素。用黑人嘅腔唱廣東話，係好嘅衝擊。女仔會係謝安琪，佢把聲好有性格，揮灑自如只此一家。組合就覺得水準差唔多，Krusty好得意，只係歌路未有個人風格，𠵱家佢哋嘅歌，只係睇到王雙駿嘅功勞。」
林夕：側田唱demo好好
「大家都聽過側田嘅歌，我諗唔使我講太多，佢未作曲前唱demo，已覺得佢唱得好好，好適合唱歌。女仔好多我都覺得唔錯，Janice、王菀之同謝安琪都係各有各好。」
周國豐：Soler好有男人味
「我好鍾意側田，唱功最好，好過好多舊歌手。聽佢唱live，覺得同CD冇乜分別，如果包裝上執一執會更好。女仔就Janice同王菀之都好，但要揀就Janice突出少少，因為佢唱歌時好有感覺，呢樣嘢係教都教唔到嘅。Soler就係作得又唱得，外形唔係Twins嗰隻偶像型，好有男人味，表演都好成熟。」
甘菁菁：Janice技巧獨特
「側田呢個係實力派，好唔錯，作曲唱歌都好出色。女仔就Janice同王菀之，各有所長，王菀之作曲叻，Janice有獨特嘅歌唱技巧。組合就Soler，好有實力，Krusty亦幾好，有少少行包裝。」
