看通（1059）最近兩個月，大致喺0.41元至0.45元打底，呢期想破位又未破之際，似係醞釀緊爆炸力，有得諗。看通今年8月宣布進軍祖國電子彩票投注業務，股價當時升到0.8元，瘋狂之後，家陣打回原位，好似冇事發生。
但要咁睇，市場類似股份有前稱金屬交易所嘅華彩（8161），華彩7月以嚟，升咗3.5倍，現價（2.7元）重貼近1年高位。又呢期蜂業（8156）再接再厲，有意洽購五省市褔彩軟件業，呢個concept似未玩完。再講，華彩現價係NAV13倍，高溢價肯定反映緊彩票相關業務前景，至於看通，現價重講緊同NAV0.48元有輕微折讓。以華彩做基準，看通不得了。
又呢勻看通搞電子彩票投注，發大嚟搞，11月報載，集團計劃拓展環球電子博彩業，財務顧問已經提交第一期報告，預計年底前會有總策略，重有兩星期就年結，看通爆炸力等緊短期潛在利好消息引爆。
財險貼近阻力等突破
財險（2328）上星期五啱貼住8月以嚟條阻力線，等突破，又講兩點：第一，呢期祖國房地產股狂升，其中炒賣理由，係市場翻煲人仔升值課題，呢個理由，祖國保險股同樣照單全收。第二，祖國保險股當中，平保（2318）已創出上市以嚟新高，中國人壽（2628）亦步亦趨，又快創新高，至於中保（966），由7月低位2.425以嚟，累積升咗38%，兼破埋3年下降軌。財險又點？由10月尾低位1.71元至今，彈幅不過20%，係最落後嘅祖國保險股。財險當追落後，P/B上番中保水位，股價講緊約莫2.5元，亦即係現價（2.075元）有20%潛在升幅。
錢雋