煲碟王：鄭秀文搏命演活王琦瑤《長恨歌》聽國語最啱Feel

今年港產片裏面比較有話題嘅作品，莫過於一套《長恨歌》，淨係講女主角鄭秀文點為咗拍呢齣戲而傳出抑鬱症，都已經成為好多期八卦雜誌封面。不過真金不怕洪爐火，《長恨歌》有幸成為今屆威尼斯影展正式參賽作品，十分厲害，之前冇入戲院睇嘅，都應該買番隻DVD睇吓！

記者：梁瑋瑜

■同王主任發生一段刻骨銘心嘅愛情。

■因為一個上海小姐選舉改變咗一生。

■琦瑤為康生咗一個女。

鄭秀文脫胎換骨

雖然喺香港正式上映嘅時候，《長恨歌》嘅票房認真麻麻，不過小記睇完齣戲之後，覺得呢齣戲雖然節奏比較慢，鍾意節奏快嘅主流香港觀眾未必合適，不過亦有佢值得支持嘅地方；首先係幾位主角嘅演技相當不俗，老戲骨梁家輝固然不在話下，鄭秀文嘅表現都令人驚喜，相比佢以往拍嘅愛情喜劇，完全係脫胎換骨嘅感覺，重要係由少女做到中年，當中又有唔少內心戲，都睇得出佢好用心去演，所以話佢拍戲嘅時候難以抽身，都真係有根據。

■估唔到鄭秀文個婦人Look都好有說服力。

■吳彥祖好少拍呢類文藝片，今次值得留意。

■胡軍飾演嘅王主任結局十分潦倒。

原汁原味聽國語

《長恨歌》DVD有國語及粵語供觀眾選擇，香港觀眾當然會覺得聽番粵語比較親切，不過小記發現個粵語配音竟然唔係鄭秀文原聲，聽落實在有啲奇怪，所以勸大家想原汁原味睇呢齣戲，最好揀番國語配音，聽唔明最多睇字幕。
《長恨歌》DVD係雙碟套裝，包括電影DVD及一隻BonusFeature碟，收錄咗導演及演員訪問、拍攝花絮等，想睇吓鄭秀文究竟點拍呢齣戲，就一定唔可以錯過喇。

■整齣電影顏色比較灰暗，即使連床戲都係一樣。

■BonusFeature有導演關錦鵬訪問。

■想睇製作花絮，唔買DVD都唔得。

PROFILE：

區碼：全區碼
音效：DOLBYDIGITAL/5.1
售價：$68（雙碟特別版$95）
查詢：DVDPro(23326326)
旺角奶路臣街6E德發商場地庫B4舖

同場加映

呃神騙鬼《格林兄弟幻險記》

今個星期重返咗隻《格林兄弟幻險記》（TheBrotherGrimm），由麥迪文及希斯利捷飾演專門欺騙無知村民呢個世界有鬼怪嘅格林兄弟，後來國王下令佢哋要搵番一個失咗蹤嘅細路女，終於要同真正嘅怪魔搏鬥，呢齣戲由編劇到場景設定，都係天馬行空，好鬼過癮，對童話式電影有興趣嘅不妨睇吓。

$72（雙碟連製作特輯$90）

■千年女王一角令人印象深刻。