友刊《壹週刊》對上一期大爆東亞銀行主席有寶baby之稱的李國寶，無申報出任「香港平民屋宇有限公司」主席一職，重話如果呢間公司擁有嘅大坑西邨攞嚟重建，可以賺十億元；寶baby噚日首次為呢件事解畫，話其實呢個邨重建都唔可以出售，唔係十億金礦咁話。
佢話之所以有呢間公司，係因為五三年發生石硤尾大火，要成立一家公司統籌興建樓宇安置災民，重話當時自己都好細個。
封口唔講政改
寶baby話，當年有份成立該公司嘅董事包括佢伯爺李福樹，同埋周啟邦伯爺周錫年，總共有成十個人。問政府攞咗塊二十多萬呎嘅地，喺大坑西起咗八幢樓畀災民住。佢話，政府重畀咗個低息長期貸款啲災民㖭！呢五十年嚟，嗰十個董事都係義工，一毫子都無支過薪㗎！
不過，寶baby話十個董事嘅唯一利益，就係可以推薦人入住該屋苑。佢重強調，任何人都可以申請嘅！佢話佢係喺九九年接任馮秉芬，接任做主席，重帶咗幾個同事入去。𠵱家佢哋研究緊重建，但佢強調，按規定，重建後都唔可以出售嘅！幾時重建就要睇政府批唔批啦！
對於大家好關心嘅政改問題，身為行會成員同埋立法會議員嘅寶baby就話封口唔講意見，因為佢想留番喺周三嘅大會上一次過講。佢自己估政改方案，獲得通過嘅機會係五五波，但佢對煲呔曾同肥龍充滿信心，估應該可以攞夠票通過！唔知大家點睇呢？
傳真︰2623-9278
電郵︰[email protected]