站在四十六層高的天台，想到葉璇在劇集《情陷夜中環》的一場天台跳樓戲，身為藝人要承受不少壓力，問她可曾有過自殺傾向？葉璇忽然壓低聲說：「有呀，大約半年前，我同任職金融嘅男朋友拍咗拖一年，但因為有第三者介入而分手，當時我好傷心，情緒好低落，一個人喺屋企諗唔開，忽然拎咗把刀想割脈，好彩咁啱有朋友嚟探訪，我唔想牽連對方，自己又怕痛，所以就打消咗呢個念頭。」
願為愛情犧牲
葉璇坦言自己絕對肯為愛情犧牲一切，就連生命都可送上。她續說：「我好欣賞呢個男仔，佢好有才華，不過因為有一次我發現佢原來又同第二個女仔交往，個第三者重有咗BB。個男仔為咗要同我復合，就日日送花，同跪地求我原諒，嗰時我都有少少心軟，不過我都好理智同自己講，男人一次不忠，百次不用，我最終都唔肯同佢復合。」那麼舊愛是否情歸「第三者」？葉璇說：「我聽聞後來佢同第三者分手，女嘅就將個BB落咗。」直至現在，那個舊愛仍有意與葉璇復合，她說：「我嘅愛情觀裏邊，只有黑同白，完全冇灰色地帶。」
問葉璇其失戀的心情可平復了嗎？她說：「我暫時都唔諗呢樣嘢住，要遇到一個真心鍾意嘅人，絕對係講緣份，可遇不可求。」經過朋友的開解，葉璇都明白自殺解決不到問題，她亦乘機呼籲大家要珍惜生命。
家庭篇：只求父母快樂
葉璇自幼生長在一個破碎家庭，父母仳離，她在十一歲即隨爸爸從杭州到美國紐約生活，她表示這是自己人生的轉捩點。
雙親先後再婚
葉璇移民後，她的雙親亦先後再婚，分別育有一名兒子，對於這兩名弟弟，葉璇都視為手足，對他們關懷備至，葉璇說：「我雖然細個得唔到關心，本來同父母嘅關係都好疏離，不過人長大咗，加上入咗呢行，我發覺對自己最好，最唔會出賣你嘅一定係自己嘅至親，漸漸地我哋嘅關係又親密番，我亦學懂體諒佢哋。」
不過葉璇的爸爸近年由紐約轉返杭州營商，他的第二段婚姻亦不幸觸礁，她表示十分關心父親和後母的心情，葉璇說：「我不時打長途電話開解後母，而爸爸佢又開始鍾意咗跳社交舞，有一次我返杭州重同佢去跳舞，幫佢手𠝹女㖭，雖然爸爸婚姻又出問題，我都幫唔到乜嘢，只求佢生活可以開開心心。」