每年樂壇頒獎禮的鬥爭均十分激烈，新人除要外表出眾外，還要有真材實料。本報日前進行了街訪，選出聽眾心目中最喜愛的男、女和組合新人，結果由側田、衞蘭和Soler勝出。早前幾位新人碰面時，非但沒有爭雄的火藥味，反而咬耳仔分享經驗及大談新人前途。
今年樂壇的新人歌手特別多，很多更被公認為唱得之人。本報早前進行街訪，投票選出的最喜愛男、女及組合新人，分別是側田、衞蘭（Janice）和Soler，三組新人日前一起拍照，側田於外國讀書、Janice和Soler都是混血兒，故他們說話時都夾雜着廣東話及英語，且氣氛融洽。
努力尋找樂壇位置
當Soler和側田談話時，話題只集中在音樂及嗜好上，氣氛較嚴肅。但到拍照時，蹦蹦跳的Janice突然撲向他們，三個大男孩即時嘻哈大笑，所有隔膜均突然融化了。對於新人常常被傳媒作比較，Soler的Julio說：「根本唔可以講大家係對手，其實一班新人努力做嘢，去搵自己喺樂壇嘅位置，係冇乜衝突，我哋都好似朋友咁，大家都識嘅。」Janice接着說：「今年好多歌手嘅音樂我都好鍾意㗎！好似王菀之同謝安琪，好多時我都聽佢哋嘅歌。唔好話我哋喺度鬥，大家都係朋友，咁friend根本唔覺得喺度鬥緊，只係一齊合作，唱啲好歌畀聽眾聽，所以感覺好好。」
對於被選為最喜愛的新人歌手，側田、Janice和Soler均表示驚喜萬分，不過側田坦言自己仍有很多進步空間，他說：「我做到歌手，覺得除咗係天時地利之外，更因為有好多貴人，做緊幕後突然做幕前，真係唔知發生乜嘢事。但其實我有好多嘢要改，好似阿Mark（雷頌德）話我，講說話太直好易得罪人。」
對於有很多新人在娛樂圈的壽命短，有些於一年後更已銷聲匿迹，Julio說：「其實唔止香港嘅樂壇有咁嘅現象，如果有日觀眾口味轉咗，又或者冇人留意你，都係好正常，唔使睇得咁負面。如果真係唔接受我，我會明白，唔會堅持，有時未必一定要做幕前，重有好多嘢可以做。」
重歌曲迴響輕獎項
Janice亦說：「只要有人鍾意聽我嘅歌就得，而且唔好睇獎項睇得咁重，幸好Leon（黎明）唔會畀壓力我，可能佢都係artist，所以唔會push我，錯咗都唔鬧，只係叫我喺錯誤中學習。」側田和應說：「好多時都有呢啲情況，但唔代表失敗，其實錯誤可能好重要、好有用㗎！」