每年波波都會總結自己過去一年觀影經驗，然後選出今年心中的最佳電影。參賽資格非常簡單，只要係波波在戲院看過的戲，不分國籍，不論大小，都可以參加，獎項只得一個「波波──年度最佳電影」，評審準則好簡單，最緊要好睇。
上年得獎的是《功夫》，今年本以為獎項要懸空一年，因為今年一直也沒有什麼電影令我覺得特別賞心悅目，但來到年尾臨近聖誕終於出現一部。各位嘉賓，各位觀眾，「波波年度電影大獎」最佳電影，純粹個人喜好，今年得獎係──巴西籍導演費蘭度美拿里斯的──《無國界追兇》。
大部份朋友一聽到，十個有九個媽媽聲，第十個就已經緊握拳頭想抦我一鑊。大家七嘴八舌問：「乜嘢無國界醫生呀？係咪無國界醫生拍㗎？吓，無國界醫生都拍戲呀？」
Sorry，套戲同無國界醫生一點關係都無，片名叫TheConstantGardener，直譯就是《穩定的花王》，導演費蘭度美拿里斯拍過兩部戲，《中央車站》同《無主之城》，題材上一直與民眾很接近，作品充滿人道精神。前作《無主之城》以外語電影身份被提名美國奧斯卡金像獎的最佳導演，雖然最終沒有勝出，但已經改寫了奧斯卡的歷史。
新作《無國界追兇》雖然票房並不理想，但主題上仍保持美拿里斯的一貫風格，《無》片本可拍成一個像鐵金剛的間諜故事，有槍戰，有爆炸，變成一個全球大收的戲。但美拿里斯可貴的地方是並沒這樣做，他反而專注在男女主角的感情，大企業對貧苦國家的不公平真相。我覺得好好睇，是今年最佳電影。