「小朋友」威力無窮，領匯（823）前日創下16元新高後，證監會旋即話要更改遊戲規則，話REITs揸夠5％股權就要申報，而同類股泓富（808）昨日掛牌，投資者多咗選擇，可能係呢兩個原因，令到領匯昨日急跌，最低見過13.85元，收14.10元，跌9.62％。
經紀黃話，雖然確係有投資者換馬買泓富，對領匯股價有壓力，但亦有人揣測係唔係「小朋友」在出貨。但無論乜嘢原因都好，原本房地產基金呢類產品，走勢應該好平穩，大家買入主要為咗收息，股價冇理由搞到好似神仙股咁波動，反映對沖基金真係威力驚人。
另外，經紀黃提到富豪酒店（078），早前因濠江嘅投資前景未明，令股價勁散，最近終於有分析員話可以睇番轉頭，原因係過去一年酒店生意好，入住率高，憧憬業績會好靚仔，趁家陣價殘買得過。
富豪的52周高位0.81元，最低係0.445元。昨日則冇起跌，收0.53元。公司本身喺0.50元附近回購咗唔少，有一定啟示。
慕容小初