英國細路仔基金大量買入領匯、新世界與百仕達嘅股票（領匯係基金單位），引起狙擊疑雲，好多人聽見鬼佬基金狙擊，就急急表現出民族情緒，高聲叫出防範外敵嘅口號。使乜咁驚噃，講股票投資，賺錢先至係主要目的，講民族主義，講愛國愛港，講玩政治，就唔好玩股票。
散戶應該歡迎狙擊手，冇佢哋，領匯散戶點會賺到笑呀（申報利益，左丁山曾有申請領匯）。新世界股價素來好難大升，散戶等到𠵱家先至有「細路仔」掃貨，直情講多謝都嚟唔切，點解要「防範狙擊」噃？狙擊獲利嘅基本理論係股價與資產值有大差距（廣東話就係講大把水位），值得一博。散戶唔識，唔敢，冇力博，惟有等羅賓漢出現，搭一轉順風車啦。
不過外國基金狙擊本港家族大公司，眼光雖準，計算未必中的，可能要交吓學費先。譬如新世界（十七號）突然嚟一招配售新股，集資三十二億，股價折讓11%，就令TCI（兒童投資基金）吃了一記悶棍。一位投資銀行家同左丁山講，配售新股嘅好處係可以快打慢，一個朝頭早就搞掂，如果狙擊手重係死纏，以後還可以使出一招rightsissue（發行新股），以大幅度折讓價（deepdiscount）發行新股，狙擊手唔接棒就被攤薄，接棒就要磅銀死跟，無論點樣，帳面損失立即浮現，盤數好難睇。香港大家族之間，周時拍膊頭，閒話幾句，一個電話，就有幾十億，以至一百億資金「勤王」，外國基金都未必有咁多錢，唔係話乜，李四哥嘅私人投資基金已經有五百億元現金與證券啦。
外國基金狙擊本港公司，理論上可行，實際上可能猛虎不及地頭蟲。我哋做散戶嘅，理得佢邊個會贏吖，最緊要在股價突然升上之時，將倉底啲蝕本貨即時拋售，賺番一筆，否則等到供股之時，眼淚汪汪矣。