手執多個經典系列嘅NAMCO，由《食鬼》、《鐵拳》到《RidgeRacer》，全部紅足咁多年，而RPG類嘅《Talesof~》系列更係唔少機迷嘅至愛，人氣度絕對拍住《FF》、《DQ》等大作！本星期新返嘅《TalesoftheAbyss》，更屬系列十周年重頭巨作，廠方不容有失，搵嚟《我的愛神》、《櫻大戰》藤島康介擔任人設，不論正派奸角都咁靚仔靚女，玩起上嚟都零舍投入。
記者：許福合
PROFILE
對應主機：PS2
遊戲類型：RPG
遊玩人數：1至4人
開發商：NAMCO
行貨售價：$398
查詢：SONYHK（23452966）
家用版九代非單傳
正值十周年呢個大日子，埋單幫NAMCO計吓數，單單喺家用機已經推出過11個版本，唔計重製或移植版，都足足有成九集，計埋GameBoy、PSP、iMode手機版以及嚟緊嘅Online版，「九代」得嚟絕非「單傳」！
95年12月15日：《TalesofPhantasia》（SFC）
97年12月23日：《TalesofDestiny》（PS）
98年12月23日：《TalesofPhantasia》（PS重製版）
00年11月30日：《TalesofEternia》（PS）
02年1月31日：《TalesofFandomVol.1》（PS）
02年11月28日：《TalesofDestiny2》（PS2）
03年8月29日：《TalesofSymphonia》（GC）
04年9月22日：《TalesofSymphonia》（PS2移植版）
04年12月16日：《TalesofRebirth》（PS2）
05年8月25日：《TalesofLegendia》（PS2）
05年12月15日：《TalesoftheAbyss》（PS2）
唔係講笑，當年SS嘅《櫻大戰》能夠一炮而紅，藤島康介嘅人設起碼佔一半功勞！睇埋今次嘅《TalesoftheAbyss》（下簡《TOA》），仍然未令機迷失望，網上好多Fans重話好過《櫻大戰V》眾女角㖭。
《TOA》依然有行貨，筆者先睇說明WarmUp吓，一睇真係嚇咗一跳，密麻麻一堆字，看似極之複雜，都算少見。好彩實地玩過之後完全係另一回事，原來上手都唔係咁難啫。
3D場景冇得換視點
雖然遊戲玩法可算係傳統RPG模式，畫面到人物都全面3D化，可惜場景只算係假3D，人物行動都受到地圖限制，唔可以自由走動，呢點好多RPG迷還可接受，最唔方便係竟然連轉換視點功能都無，按L1或R1只會轉動角色面向，對要喺地圖周圍走嘅RPG，無得轉視點就真係唔方便！好彩，玩落並非說明書講得咁複雜，尤其係講及遊戲操作時，更會配埋按掣圖示，理解都唔成問題。戰鬥系統方面，基本操作只有攻擊、防禦同突進，亦加入有連續技，不過奇怪係唔可以自由跳避，格鬥味少咗，戰鬥時就只有靠狂按攻擊，贏取點數增加經驗值！
狂儲點數升六級魔法
除咗練功升等級外，角色能力值亦要留意，因為點樣分配點數，直接影響角色性格。最基本係AD技能，實用之處係改善玩家戰鬥狀態時可選用嘅技能。由於學習技能嘅Bonus有限，玩家要考慮如何分配，必學嘅有自由操控角色及防禦時閃避，咁就可以喺戰鬥時使用。另外加入法術類裝備，經常使用就可提高至最高6級嘅法術能力，對鍾意「訓練」角色嘅玩家，就玩得特別過癮。
系列特色煮嘢食
食飯可以補充能源，繼承前作嘅料理系統，要煮出一道好菜，當然先要有菜譜，菜譜可以經任務或同其他角色對話取得，而材料就要打怪收集，食用後可以回復氣力同生命力，過癮處係每道菜都可以「練習」，熟習後可增加煮菜成功度，回復能力會更佳，同其他RPG遊戲以購買方式補充能源，就多個好玩之處！
唯一弊病讀碟慢
此作論畫面、玩法到戰鬥場面，都係具水準之作，不過進行遊戲時，畫面就經常被中斷，事關Loading實在太多太密，雖然每次都只不過3-5秒，但亦難免令人覺得不夠爽快，尤其每次進入戰鬥畫面都要Load一次，當喺野外時，可能剛打一隻怪物出來又要再Load一次打另一場，即使喺地圖走動，亦要Loading幾次先走得完，真係要改善一下！
玩家意見
