普天同慶嘅聖誕節又來臨，大大細細嘅party等住大家出席。作為政府骨幹嘅AO協會都好應節，噚日起一連兩日都會搞gathering，等班政務官坐埋一齊、聯誼一番。
八方記得，陳太幾乎年年都去捧場，但噚日喺Banker'sClub嘅AO聖誕午餐會，就唔見陳太蹤影，有與會者話陳太臨時有事，所以甩底，令聚會少咗一啲「星」味。
講真，話陳太臨時有事唔得閒出席，八方有啲懷疑，事關好多人都同八方講，話自從陳太喺12.4行咗出嚟之後，四方八面嘅暗箭都向住陳太係咁射：無論係咪要選○七特首，咁樣俾人抹黑都唔得掂，所以真係要小休一陣低調啲先得。
有局中人更大爆手袋黨近期多咗接觸嘅原因，原來係因為一個人，就係前民政司李福逑喇。原來逑老早前喺外國返咗香港，佢一向被手袋黨同老一輩AO視為「大師傅」。
得聞大師傅返嚟，梗係要聚一聚先得，結果活動搞手、又比較活躍嘅眾人媽打李麗娟，成為聚會發起人，聽聞逑老同一眾舊部（當然係以手袋黨為主），呢一年嚟差不多每個月都碰頭，聚腳點主要都係馬會或者其他高級會所。
見得咁頻密，當然引起各方人士密切注視，話咗要「見步行步」嘅陳太，以後真係每次出場都要三思，因為佢每一句說話，都會俾人徹底「解讀」，未諗到下一步點樣行得靚靚哋，自然係唔到好過到啦。
契媽年年聖誕聚會都到
冇咗陳太，AO聚會少咗個好閃亮嘅人，但都重好熱鬧，噚日開咗十圍八圍，數數手指，八方眼見到場嘅，男嘅有平叔、陳育德，米老鼠同黎年，女嘅就更多，劉吳惠蘭、尤太、林鄭月娥、李淑儀同張琼瑤都着到靚一靚捧場。
退休咗嘅媽打李麗娟都有到，咁多人之中，佢最熱心，媽打話自己做公務員卅四年，呢個活動從無一年缺席過，簡直係最中堅支持者。同樣離開咗政府嘅陳祖澤同詹伯樂都有出席，唔知佢哋有冇向啲後輩傳授錦囊呢？
佢哋食完晏個個都嗱住個金光閃閃嘅禮物袋仔，原來係Banker'sClub送畀大家嘅小小禮物，入面裝住一個小型鎚仔，應該係畀人喺聖誕節走落街頭，扑人個頭講句MerryChristmas啩。咁有乜好食？當然有應節嘅火雞啦。
傳真︰2623-9278
電郵︰[email protected]