九龍華仁書院資深老師江之均日前投河自殺，由於事出突然，唔少九華仔都嚇咗一驚，江Sir喺九華任教多年，春風化雨桃李滿門，一班舊生成立治喪委員會為老師辦後事。
立法會議員梁家傑話，江Sir係佢中五至中七英文科老師，佢有今日成就，真係要多謝江Sir啟蒙。
梁家傑透露江Sir有兩個碩士學位，六十年代開始作育英才，多年嚟深受學生愛戴，四年前先退休，但仍為學校做義工教中一新生英文，佢大讚江Sir對教育好有承擔同英文修養高，特別成立咗個教育基金幫助學生，而佢係信託人之一。
治喪委員會下星期二朝早喺學校禮堂舉行追思彌撒，夜晚喺香港殯儀館為江Sir設靈，翌日出殯。校長蘇中平叫同學如果唔送花圈，可考慮捐錢畀教育基金，將江Sir遺志發揚光大。
梁家傑話一班舊生決定喺彌撒上為恩師獻唱江Sir最喜愛嘅TheImpossibleDream，想練歌嘅校友，聽日下午兩點鐘學校禮堂見喎。
傳真︰2623-9278
電郵︰[email protected]