紅色太陽眼鏡、cap帽加埋40幾吋肚皮，就係香港大胃王JohnnyWu嘅招牌icon。今次佢要去挑戰8個新出嘅日式漢堡包，結果梗係難佢唔倒！食完之後都話唔夠喉，要食多個煲仔菜先至得，真係服咗佢！
記者：梁學文
攝影：陳偉強
日式米飯做包皮
一坐低Johnny見到8個漢堡包擺喺面前就已經雙眼發光：「嘩！好正！」咪咁心急住，話晒都係日式漢堡，都要知道同美式漢堡有咩分別先得，如果唔係食完都唔知係乜！最明顯係個size，日式漢堡細過傳統美式漢堡，其次就係做漢堡包皮同漢堡包餡嘅用料，好似日式米飯漢堡就會用日式米做皮，重會加埋日式醬汁。
加生薑照燒汁好東瀛
日式漢堡包包皮用高纖全麥包或日本入口嘅秋田小町米壓成，味道同口感都跟美式嘅好唔同，而餡料同做法方面，日式漢堡會加入生薑，或用日式照燒汁煮漢堡餡。講咁耐，係時候睇Johnny表演喇！
雙層牛肉漢堡 最夠肉味
畀多塊牛肉就係雙層牛肉漢堡？你估係老麥咩！呢款雙層牛肉係肉醬同漢堡扒，即係等於有雙重口感。三分鐘都唔使，雙層牛肉漢堡就經已全部喺Johnny個胃入面。
Johnny：「我最鍾意係呢款漢堡，夠肉味，肉醬同漢堡扒有兩種口感，嚟到一定要試。」
𡁻咗幾耐：唔使3分鐘
芝士豚肉漢堡 豬髀滑溜
呢款用QP汁同日式照燒汁煮嘅豚肉漢堡，係Johnny第二推介。豚肉即係豬肉，呢款漢堡係用豬髀肉做，所以口感夠滑溜。
Johnny：「豚肉入口好嫩滑，連埋啲芝士好好味。」
𡁻咗幾耐：3分鐘
吉列魚柳漢堡
青衣魚柳加埋蛋沙律，就係魚柳漢堡。用青衣魚柳做漢堡，優點係無咁易散，而且魚肉較腍身。
Johnny：「口感唔太夠，但係就有魚味。」
𡁻咗幾耐：3分鐘
香脆豚肉漢堡
原本日式嘅吉列豬扒會用大粒嘅麵包糠炸，來到香港就改用細粒麵包糠，但係口感重好。
Johnny：「個口感幾似豬扒包，不過塊豬扒就好鬆化。」
𡁻咗幾耐：3分鐘
日式照燒雞柳漢堡 包皮夠索
照燒雞味道甜甜哋，配合爽脆生菜絲，簡直係天生一對。生菜絲用冰水浸過，夠綠夠脆。
Johnny：「個汁好好味，包皮索晒。」
𡁻咗幾耐：2分鐘
日式蟹柳漢堡
唔好一聽蟹柳就以為係cheap嘢，呢度用嘅蟹柳其實係日本松葉蟹腳。
Johnny：「雖然蟹柳無咩味，但係估唔到會用松葉蟹做漢堡，好特別。」
𡁻咗幾耐：2分鐘
生薑豚肉日式米飯漢堡
做日式米飯漢堡，師傅要花多幾倍工夫，因為要將米飯壓到實，不過米飯漢堡入口又好煙韌，生薑酸酸哋又好開胃。
Johnny：「個飯油咗啲啲，不過個汁好好味。」
𡁻咗幾耐：2分鐘
燒牛肉日式米飯漢堡
日本秋田小町米質感夠煙韌，最適合做米飯漢堡同壽司。燒牛肉就用肥牛做，入口嫩滑，難怪Johnny食完都勁讚：「啲牛肉好味，夠Juicy。」
𡁻咗幾耐：2分鐘
Suzuki（31481338）
地址：觀塘創紀之城第五期apmUC-1號舖
座位：80個
營業時間：11:30am-12:00mn
各款日式漢堡：$58（連沙律或薯條）