噚日本報披露咗商台叱咤樂壇流行榜頒獎禮嘅戰況，點知馮仁昭即刻收到一封機密文件，話係據一名商台女員工發出嘅可靠消息，成份頒獎禮得獎名單已經出咗嚟，好多大獎都同本報報道嘅幾乎一樣，古巨基係男歌手金獎得主，女歌手金獎就畀容祖兒，組合話係Twins喎，而男女新人就分別係側田同王菀之。
至於專業推介叱咤十大，十大歌曲據報係陳奕迅嘅《夕陽無限好》、古巨基嘅《天才與白痴》、林海峰《男子組》、劉德華嘅《我得你》、薛凱琪《小黑與我》、鄭中基《無賴》、楊千嬅《烈女》、李克勤《情非首爾》、容祖兒《天之驕女》同埋草蜢嘅《萬眾期待》。
今年基仔同陳奕迅爭得難分難解，名單顯示基仔嘅《天才與白痴》會攞到我最喜愛歌曲獎，陳奕迅同容祖兒就分別奪我最喜愛男女歌手獎，而Twins就攞埋我最喜愛組合獎。
基仔有信心
雖然話基仔攞獎呼聲高，不過噚日佢喺九龍灣為音樂會綵排嗰陣，就話自己只會抱住順其自然嘅心態，講到陳奕迅係佢勁敵，基仔就話：「總之個個都咁好，我對自己都有少少信心。」
𠵱家距離截止投票日期重有兩星期左右，如果上述賽果屬實，咁係咪有內定之嫌？不過馮仁昭又諗到另一個問題，就係歌迷要使錢用手機發短訊投票，咁係咪有搶錢之嫌呢？