濰柴（2338）近期頻頻被大行調低投資評級及目標價，股價由18元樓上跌至17元水平，大摩噚日份報告一出，更令濰柴股價應聲急挫16%至14.35元，連大摩調低後的目標價16元（之前是25元）亦失守。
究竟今次大摩支笛點解有咁大威力呢？原來報告提到，濰柴嘅大股東兼大客重汽（佔其營業額比重25-30%）最近將部份發動機採購定單轉移至杭汽發動機，令人關注到濰柴是否已失去大股東的全力支持，再唔係重汽的唯一發動機供應商，而濰柴收購杭汽發動機一事延遲，亦似乎反映同重汽關係有變。假如濰柴失掉重汽呢個大客，亦即是失去25-30%營業額，要搵番個有相同份量嘅新客，絕不容易。
勿當冠捷失單事件
阿虎即時醒起冠捷（903）事件，日前有報道話其主要股東飛利浦將部份定單判畀台商而唔畀冠捷，消息曾令冠捷股價大跌5%，其後冠捷向外澄清，其實是公司拒絕接單，而不是定單流失，結果股價即反彈5%。唔知濰柴今次又點樣向外解釋，以挽回股價嘅弱勢呢？
黑客話，兩件事根本唔同，濰柴管理層與大股東關係一向傳出唔妥，較矚目是重汽本計劃來港上市，但被濰柴所阻撓。不過，相信這可能是雙方管理層的問題，重汽畢竟持有濰柴24%，屬一項重要資產，照計冇理由任股價係咁插水。
阿虎