恒指由跌91點變成只跌29點，市底都算硬淨。過埋呢一兩日，少咗韓農示威因素，個市走勢或者會比較明朗。
令恒指冇跌得咁多嘅第一功臣，係中移動（941），第2大功臣係恒地（012）。
恒地C輪：恒地係升幅最大嘅恒指股，恒地C輪，自然好多上咗龍虎榜，不過好少人發達，事關冇乜街貨。升得最勁嘅9318，街貨得2.2%（即係4.4球），成交40萬份，輪價升110%。10隻有成交嘅恒地C輪，總成交金額得440萬元，有幾多人發財？
有隻恒地末日C輪3609，繼續1仙求售，下周二最後買賣，行使價42.88元（正股做36.95元），自然冇法子跟正股升。呢隻死火嘢，原來街貨高達81%（即係高達486球），去年6月以每份6.9仙發行，𠵱家等作廢，真陰功。急升嘅C輪，散戶冇貨得個恨字；就變廢紙嘅，散戶則揸到幾乎爆棚。唔怪得有啲散戶話贏就冇份，輸就輸足。
恒地C輪，勉強可以博嘅係9852，明年8月尾夠鐘，輪價38仙（昨日只升12%），溢價7.7%，槓桿率9.7倍（有效6倍），引伸波幅25.4%。但買恒地C輪要提防正股有回吐。
新世界C輪：新世界（017）跌0.35元，做咗最大跌幅恒指股。如果係都要博新世界反彈，C輪勉強可以揀9171，明年3月初到期，輪價79仙，溢價9.3%，槓桿率13.9倍（有效7.1倍），引伸波幅41.4%。
章盛