一個現實版的「What'sMichael!」，變奏版卻換上白雪雪的加得里奧和深啡色的米高。一大一小，一隻是惡霸老祖安哥拉長毛貓，一隻是頑皮百厭小花貓，每晚踏正十二點，兩隻勢不兩立的中西孖寶都必定上演一場大戰，打個你死我活！但主人Janice每當使出鎮壓貓戰武器——老鼠衫，兩隻小貓立刻坐到乖一乖、定一定。
記者：許維雅 攝影：伍慶泉
肥肥阿扁（又名：老祖）(左)
年齡：5歲
性別：男
品種：安哥拉長毛
貓福（又名：MK福）(右)
年齡：2歲半
性別：女
品種：唐花貓
大戰逐格睇：
Janice由細到大都喜歡貓，直至五年前自己搬出嚟住，私人空間多咗，於是毅然走到九龍城貓店用＄5,000買了一隻三個月大的安哥拉長毛貓。買回來後，因當年陳水扁順利成為台灣總統，Janice爸爸就為他起名「阿扁」喇！兩年幾前，Janice有一次行經旺角花墟時，見到一隻骨瘦如柴、周身皮膚病的花貓在街頭奄奄一息，她毫不考慮地將花貓帶回家中，更作了一個大話𠱁男友把牠收養。為咗希望牠可以為家人帶來福氣，就幫佢改名為「貓福」。最後Janice男友Kenneth還十分疼愛貓福，更把牠視為己出，之後逐漸形成兩貓各據一方的形勢，阿扁跟Janice，貓福跟Kenneth。
搞到大佬扯火午夜決戰
一向橫行霸道的阿扁面對新同屋，起初互不理睬，各佔地盤，一人一個主人。直到貓福逐漸長大，頑皮百厭的性格往往引發連場激戰。Janice：「每晚十二點左右，身痕的貓福最喜歡撩是鬥非，最愛挑釁老祖大哥阿扁。起初怕煩的阿扁都會忍讓閃避，但貓福會窮追不捨，不停搞阿扁直至佢發火為止。老祖一扯火就會立刻追住貓福打，貓福習慣先還兩拳，一發覺失勢就會大逃亡，繼而大叫搵大佬Kenneth求救，晚晚如是，絕不欺場。」
老鼠衫鎮貓
有時要控制兩隻心愛寶貝貓絕非易事，牠們經常你追我逐，破壞力驚人，但偏偏兩隻頑皮貓的死穴就是老鼠。「佢哋兩隻嘢最驚就係米奇米妮，應該話係兩件米老鼠衫。有時真係想佢哋乖啲定啲，等我可以做吓自己嘢、執吓屋咁。有一次我行街見到寵物店啲衫仔好靚，一心諗住買返去玩吓，點知竟能成為收服兩隻惡貓的撒手鐧，一幫佢哋着衫，兩個會立刻乖乖哋坐定定，阿扁就郁都唔郁，貓福有時重會詐死㖭！好似超人變身一樣，好搞笑！」Janice哈哈笑道。
愛吃CheeseCake變肥貓
Janice為討愛貓歡心，往往以寵貓為己任，一知道佢哋鍾意食乜就仆倒去買畀佢哋食。好似阿扁由細到大都唔喜歡食普通貓糧，於是就買新鮮雞肉煮熟，逐粒逐粒餵佢食，後來發現佢喜歡食芝士又買新鮮芝士畀佢食。有一次，喺Starbucks買了一個BlueberryCheeseCake返屋企諗住自己食，點知阿扁見到愛不釋手，於是𠵱家Keep住都會買畀佢做甜品。平時好難叫得佢郁，唯一嗜好都係追吓波子，阿扁真係一隻識歎又識食的大肥貓。至於貓福就無咁貪食，不過行為就古怪啲，竟然有鋪咬膠袋癮，有時重食埋落肚㖭。
肥肥扁玩波子
識歎又識食的肥扁一向唔係幾郁，平日嗜好都係追吓波子，活動量極少，成隻加得里奧一樣！
