沈殿霞愛女鄭欣宜早前扮白雪公主演出，結果惹來網友惡意抨擊。不過欣宜對自己的歌唱才華仍信心十足，更將自己灌錄的新歌放在網上任人免費下載試聽，以實力反擊惡意抨擊她的網友。而音樂人側田、資深DJ周國豐及華納董事總經理陳志光聽過欣宜的作品後，均讚不絕口，陳志光更聲言有意簽她當歌手。
從小已對唱歌跳舞有濃厚興趣的欣宜，繼早前為張玉珊修身堂唱廣告歌《起飛》後，近日又以JCi之名與男友林寶麟Terence合作組成Teemuhae&JCi，當中Teemuhae是林寶麟的化名，JCi則為欣宜英文名JoyceCheng簡寫。近日欣宜在網上發表二人創作的《Adrenaline》、《AintComingBack》和《Irresistible2005》，三首分具hiphop及R&B風格的歌均由欣宜主唱、林寶麟作曲、演奏及rap。
側田欣賞
「應返港發展」
在歌手自我介紹一欄中，欣宜放了一張自己的超低胸照片，並自稱是hiphop及R&B歌手，又指Teemuhae對其音樂影響最深遠，而Destiny'sChild、瑪麗嘉兒（MariahCarey）和DavidTao（陶喆）同樣對她的音樂路向有一定影響。
對於欣宜將自己演唱的歌曲放上網任人下載，其父鄭少秋昨日在電話中說：「我唔知噃。」而他試聽歌曲後即說：「旋律好輕快，音域好廣，欣宜咬字都好清晰。佢唱中英文歌都好聽，遺傳咗我嘅音樂細胞。」問秋官可贊成欣宜做網絡歌手，他說：「佢做乜嘢我都會支持佢，最緊要佢開心，呢啲嘢又冇害人，等我得閒都下載嚟聽吓。」
記者昨日邀請了本港多位音樂人試聽欣宜的新歌，眾人不約而同大讚欣宜唱功不俗。曾擔任唱片監製及作曲人的熱爆新人側田，昨日聽過欣宜所唱的三首歌後，大讚欣宜有才華，他說：「如果一百分為滿分，我就畀八十五分，個幕後製作做得好好，好有才華，欣宜唱得都好好，啲歌好西化，咬字又好正宗，好有地道嘅感覺，好有靈魂。唯一我覺得係唱腔『惹火』（wild）味道重未夠，如果再爆一爆就更加好。我覺得佢應該返香港發展，我好想聽佢唱廣東歌。」
而現職華納董事總經理的陳志光在電話中說：「佢把聲幾有質感，聲底、音準唔錯，但太掛住咬字而影響到唱歌嘅feeling，演繹感情唔係控制得特別好，佢可以再去得盡啲，暫時都未有性格出到嚟，但有空間進步。以普通女仔嚟講，十分滿分嘅話佢有八分，唔錯㗎，因為唔知有幾多音效，唔知後期做咗幾多嘢，如果佢係唱live嘅話，有十分㖭。」
高層滿意
「我都好有興趣簽」
陳志光又說：「佢live表演都有咁好嘅話，我都好有興趣簽呀，佢有啲角度都幾靚，佢爹哋媽咪做呢行，令佢天生有表演慾，佢企出嚟已經好有自信。」
而港台DJ周國豐說：「三首都係hiphop，可能欣宜從小喺外國長大，受到西方音樂影響，佢嘅節奏感幾好。以新人嚟講，佢已經uptostandard，唔會令人覺得佢玩玩吓。」
欣宜歌曲網址 http://www.soundclick.com/
bands/pagemusic.cfm?bandID=284911
採訪、攝影：李珮洳、戴彩煥、朱倬誼、比華利
