場內報料，經新iPod一輪搶攻後，MP3機開始有啲膩膩哋，個市又開始轉番落PMP之上！
AKIRA新返咗隻XMINI嘅PMP，一攞機上手好多人都話佢個2.5"芒好醒神，話晒都係玩26萬色加508×240高解像，睇落去真係幾Fine吓，更方便者係佢有AV線直入，一駁上電視即錄，免除好多壓片同Download嘅麻煩，對於筆者呢類喜歡睇電視嘅懶人至啱！格式行ASF（MPEG4），內置128MB，唔夠用重內置SD卡插槽，最高支援1GB（街價約$400），出機時真係唔買張唔得；不過最要讚嘅係佢嗰對立體聲喇叭，雖然只是1cm單元兼只有0.5cm嘅厚度，但真係幾好「炸」吓，重大聲過我平時用PSP睇片！其他功能還包括有FM收音機、WAV錄音同相片簿等，基本功能都算齊全！
另外，重要講吓佢嚿電，XMINI採用充電式鋰電池設計，30分鐘充滿，玩足4-5個鐘，電池型號為NP-60，玩開FUJIFILM數碼相機者，應該唔會陌生，佢同FinePixF420嘅電池基本一樣，好處係大家買電會平啲，一般代用電池，場價做緊$100左右，咁就唔使怕睇睇吓冇電咁冇癮啦！
記者、攝影：朱崇德
華仁會（23980280）
地址：旺角花園街75-77號花園商業大廈3樓
