金王Ｃ係黃金大好友，金銀貿易場內係人都識佢。前年（二○○三年）與佢食飯，佢叫左丁山買金，講明唔買唔得，又話以佢三十年黃金交易嘅經驗，黃金雖然冇息收，但以四百二十幾美元買一安士黃金，兩年內嘅回報一定超過20%，好過存款好多，左丁山唔聽佢嘅話，就係信唔過佢嘅聲譽喎。金王Ｃ隻馬雖然輸到左丁山跳跳扎，報唔到仇，但佢堅持話金價兩年內升破五百美元，都要畀吓面佢嘅，於是當日食完飯就立即走去銀行買金。
眨眼間，過咗兩年，前日收到金王Ｃ嘅聖誕卡，金王Ｃ加多一行字：「金價可破六百美元」，真係大好友也。抵死呢，左丁山係小戶心態，驚死賺唔切，幾個月前已經賣咗一半，賺得少，𠵱家見到金價猛升，恨到吞口水，本來想再次獲利回吐先至過聖誕嘅，但見到金王Ｃ嘅聖誕卡，一於繼續持有，一於信佢到底，唔怕十年黃金變爛銅！
與賓架Ｋ講起，佢話「獲利永遠錯不了」，叫左丁山唔好咁貪心，割禾好過年，過得安樂，以佢自己為例，最近就賣出兩隻股票，執番一籮穀先。賓架Ｋ人工高，花紅肥，股票有收穫，羨慕死人，賓架Ｋ話：「有時賺錢講好運，我買股票，要仄得好清楚，不能發生利益衝突，買咗之後，要立即向公司申報備案，買入後要等起碼一個月先可以賣番出去，我呢兩隻股票買入後，立即坐艇，但因公司禁售，唔可以止蝕，冇得郁，只好等呀、等呀、等到年尾，居然兩隻股一齊反彈，好鬼盞。」
佢就開心啦，賺完錢，公司下令不准返工，留在家中聽命，變相放假一天，因為世貿會議開幕日（十二月十三日），賓架Ｋ公司接近外國領事館，公司驚住世貿示威者搞事，索性停工一天，叫啲員工喺屋企自動自覺地辦事。香港人未見過世界級示威場面，人人驚定先，管理層尤其騰雞，可能係自己嚇自己啫。