港股連升兩日，恒指收15059，進帳82點，有雅居樂（3383）同華鼎（3398）兩隻新股掛牌，大市成交增到223億元；期指收15087，升46點，高水幅度略為收窄。
恒指升破短期下降軌，又重上10日線（15023）同20日線（15012）之上，若能守穩其上，後市可看高一線，初步向15200進發。滙控（005）上到126元就遇阻力，收125.90元，升0.50元；滙控能否突破126元阻力，係大市能否再上嘅關鍵。滙控牛皮咗成年，各大行都看好佢嘅前景，相信今次可打破悶局，威番一次。
領匯（823）新高完又再新高，噚日果然去到第一個目標16元，收15.60元，升0.60元，成交近7億元。領匯上到呢個水平，重見到啲大冧巴係咁密密收集，散戶小甜頭嘗過、大茶飯食過，手上嘅貨已散得八八九九，大戶收到今時今日，領匯貨源已歸晒邊，相信好快會有好戲上演。
中電信（728）落後同類股，噚日走勢終出現突破，相信可藉兩個利好消息，追回部份「失」地。中電信噚日最高2.85元，收2.825元，升5仙，成交更大增到1.2億股。
預測PE不足8倍
利好消息1：中電信會引入國際電訊商做策略性股東，現時已有多家國際電訊商主動叩門，如一切順利，不排除明年便可成事。
利好消息2：中國已表明3G將會在06年上半年起動，趕在北京舉辦奧運前面世，中電信有極大機會獲得1個牌照。
中電信現價只反映其固網電話業務價值，未有反映日後會開展的移動電話業務，麥格理證券指內地電訊業重組中，中電信將會係贏家，給予其「優於大市」評級，目標價3.57元。
中電信的增值服務同互聯網業務增長強勁，05年（12月年結）盈利估約300億元人民幣，每股盈利0.37元人民幣（折0.355港元），預測PE不足8倍。
中電信股價走勢已明顯轉強，上周一舉而升破3條短期平均線，現時10日、20日同50日線已恢復強勢排列，噚日股價升穿2.825元的旗形阻力，短線上升目標係3.05元。中電信C輪可吼9796，噚日收0.32元，升破0.325元阻力可見0.40元。
郭兆誠