港股繼續擺脫日股下跌嘅影響，恒指進帳82點。又係滙控（005）、中移動（941）與和黃（013）3大重磅股帶住個市上，總共拉高恒指53點。
滙控升0.50元，滙控C輪4907升得1.5仙。新地（016）升0.35元，新地C輪9059升得0.5仙。兩隻輪都升得未夠，好多C輪，都未跟貼正股升足，因為過多9個交易日，就踏入06年。每逢轉月份，窩輪溢價例牌縮一縮。
華能C輪9153：華能（902）係第5大升幅嘅國指成份股，收5.35元，升1.9%。華能05年業績麻麻，但股價已低沉多時，早已作出咗反應。年近歲晚，芬佬做年結，要做番啲嘢，華能短線可以再睇高些少。
搵華能C輪短炒，幾乎只得隻9153揀得落手。明年8月中到期，輪價18.3仙，溢價9.6%，槓桿率29.2倍（有效10.1倍），引伸波幅20.6%。壽命長，轉月份對溢價冇乜影響。
網通C輪3457：網通（906）經兩日急升後，昨日回落0.15元，C輪3457調整10%，收1.51元。網通再跌啲，買3457，隻輪明年1月20日夠鐘，溢價0.3%，槓桿率8.4倍（有效8.3倍），引伸波幅18.6%。壽命有限，已近平水。
章盛