提起「金利來」呢個60年代創立嘅品牌，大家自不然會諗起曾憲梓、領呔，或者男裝，但點都唔會聯想到飲食或者恤髮，所以，當華華知道佢哋喺蘭桂坊開咗間四層高嘅GoldlionTSR生活概念店，賣嘅竟然唔係呔，就即刻去八卦一下。
金利來副主席兼行政總裁曾智明（圖中者）話，金融風暴之後，佢哋集中喺內地及新加坡發展，今次想喺香港做番起個品牌，計劃咗一年左右，用咗600萬元投資及裝修新店，以「Goldlion」品牌做生招牌，至於TSR就係茶藝館、髮型屋同埋餐廳嘅簡寫，主要對象係專業人士及白領客人。
見到曾智明，好少會唔問吓曾太（黎瑞恩）嘅近況，佢同華華講，老婆都好忙，事關要專心湊兩歲幾嘅女同埋五個月大嘅仔，開店前都有帶埋太太試餐廳嘅菜式，但太太就無乜意見囉！至於曾憲梓，聽聞佢近日身體幾好，得閒嘅話重會去馬會游水㖭。