香港玩具廠商會噚日頒發咗最傑出成就獎畀業內人士，得獎嘅係老行尊－－和記港陸（0715）董事長高月明；該會下晝先公布結果，到夜晚喺洲際筵開50幾圍兼且正式進行頒獎。高月明得獎自然笑到見牙唔見眼，不過佢好謙虛，話多得家人及同事支持，先至有今日成就，佢同華華講，噚晚自己包咗4圍，同家人及同事慶祝。都抵一班同事喺後面撐佢。
高董早喺70年代已經投身玩具業，由基層做到副總經理，之後喺89年同陸宗霖、譚裕民及陸地等人合組港陸國際集團，做忍者龜做到名重一時，喺01年就畀誠哥睇中，收歸和黃旗下，連公司名都改埋。
講到未來大計，高董話做自家品牌貨品係大趨勢，所以來年佢哋會增聘多20至40個設計員工，重話現有員工來年都一定有人工加及有雙糧，而表現好嘅重會有額外花紅㖭，最多嘅分分鐘有成2個月㗎！又有飯食，又有錢分，高董都算識做！
李華華