噚日本報收到個報料傳真，話陳冠希（Edison）喺今個禮拜二大鬧位於東京嘅CeruleanTowerTokyuHotel。
事發當日大約中午十二點幾，有個酒店服務員拍Edison嘅房門，話有人投訴佢間房嘅音樂聲好大，所以想叫佢唔好咁嘈。點知Edison好鬼嬲，走落大堂向經理投訴，重一邊食煙一邊鬧人。當時酒店方面已經不斷向佢道歉，但Edison仍然火氣十足。
拒再入住
馮仁昭收到料後，嗱嗱聲打電話問Edison做乜咁好火，佢話：「一早俾人拍房門嘈醒，點會唔嬲？個女服務員已經見我掛咗個『唔好騷擾』嘅牌喺門口，重要係咁拍門。當時我重未瞓醒，間房黑麻麻，粒聲都冇，何來音樂聲？」
Edison重話：「我叫佢入嚟睇，佢睇完即刻同我道歉，其實呢個服務員喺門口聽到冇聲，就唔應該拍我房門嘈醒我啦，呢間係五星級酒店嚟㗎！我愈諗愈嬲，就落大堂同個經理投訴。我同經理開咗三個條件，一係佢哋再搵間房嚟拍門，咁對我先公平；二就唔收我房租；三係我以後都唔會再入住呢間酒店。」酒店方面當然冇理佢提出嘅條件，Edison咪選擇以後唔住呢間酒店囉！