聖誕節活動真係日日講都有新話題。尖沙嘴海港城前面條廣東道，近幾年已經成為節日狂歡街頭派對嘅指定場地之一，平安夜又有街頭倒數活動，嘉賓係復出開演唱會嘅草蜢，加埋新人周麗淇同吳卓羲。
想過一個嘭嘭聲嘅平安夜，今個禮拜六下晝三點鐘，去海運大廈SportX多功能運動場，捐一百蚊畀香港血癌基金，就可以換到一張晚會VIP區入場券，每人最多兩張，先到先得。
若果想繼續聽歌，二十五號當日，可以去荃灣悅來酒店商場悅來坊，參觀一班業餘唱作人嘅比賽，司儀係DJ啤梨，評判團包括側田、南拳媽媽、廖雋嘉同埋李逸朗，對於後生仔女嚟講，係唔錯嘅活動。
而新地銅鑼灣世貿中心，就喺除夕夜（12月31日）舉辦「狂歡舞動飛躍2006」除夕倒數嘉年華。