徐濠縈及好友黃偉文昨日到金鐘出席珠寶腕表活動，穿高跟鞋的徐濠縈否認再度懷孕，並向記者表示如不相信她，三、五個月後便知她沒有說謊。徐濠縈又透露因湊女時尖叫，致聲帶生瘜肉。
徐濠縈、黃偉文及名模Danielle等昨日在金鐘太古廣場出席珠寶腕表品牌RogerDubuis活動，名模陳嘉容和三位模特兒示範腕表。
有傳再度懷孕的徐濠縈穿黑色裙及高跟鞋出現，記者上前恭喜她，徐濠縈即說：「梗係唔係啦。」問她是否怕BB小器所以不認有孕，徐濠縈說：「我都生過怕乜嘢講，遲啲先再生啦，我計劃生兩、三個都OK㗎，不過𠵱家個女重細，得一歲零兩個月，佢成日扭人抱，如果有咗點抱佢呀，同埋我得一百磅都有咗就弊啦，你睇我重成日着高跟鞋紮紮跳，你哋係唔信嘅，過多三、五個月見我就知我冇講大話啦。」
成功戒煙
徐濠縈又表示懷第一胎時戒了煙，後來忍不住再吸煙，不過現在終於成功戒掉煙癮，她說：「醫生話我聲帶生咗粒瘜肉，重出血㖭，𠵱家食咗兩個禮拜類固醇，我懷疑自己係同個女玩，同埋叫傭人做嘢時太大聲尖叫，Eason都叫我講嘢要用丹田氣，唔好咁激動。」
提到老爺陳裘大上訴得直，獲發還重審，對此徐濠縈說：「關於私人事我都要好『行』咁講一句無可奉告啦，始終係老爺嘅事。」
此外，早前陳小春甩底黃偉文（Wyman）的十周年演唱會，黃偉文昨日說：「我嬲完啦。」有指小春會在另一場合補唱Wyman的作品補鑊，Wyman說：「唔使啦，有乜嘢意義，隻鑊又冇爛。」
採訪：DebbieLum
攝影：RickyChan
