史納沙屬智慧型醒目狗，故Steven養阿Mo時相當頭痕，他說：「佢一日食三餐，食乾嘅狗糧，夜晚多數烚雞，日頭唔食就罷，當減肥。佢真係有性格到爆，成日鬧情緒，以前一個禮拜帶佢去街兩、三次，𠵱家一個禮拜一次，成日扭計啦，一出街就攬實我隻腳。我唔識用狗牙刷同佢擦牙，所以會買狗嘅潔齒餅畀佢食，同佢沖完涼要幫佢解番開啲毛，纏結就要幫佢剪。」