Boy'Z成員張致恆（Steven）飼養的史納沙狗女Momoko，確實狗似主人形，一人一狗均肚腩凸凸，Steven形容愛犬脾性似足大小姐，要由他親自捉蝨兼執屎，白天上演人狗互咬，晚間則同床共枕，非常sweet。
男子組合Boy'Z成員張致恆於三個多月前，獲朋友贈送一頭三歲史納沙狗女Momoko，Steven暱稱牠阿Mo。日前Steven拖阿Mo到大坑遊玩時笑說：「佢好為食，平日都係食狗乾糧，一食濕糧就嘔，試過喺屋企嘔咗成大灘嘢出嚟。」說時還捧起阿Mo雙手問牠：「你係咪異形呀？」
幫手抹口水
Steven拖阿Mo散步，阿Mo興奮得跑來跑去，就算主人叫到氣咳，也不理睬，Steven嘟着嘴對牠說：「你次次出街都唔理我㗎？」雖然一人一狗相處日子不長，但阿Mo很懂性，Steven叫牠做hand、sit的動作，牠都會乖乖照做，惟獨出街時太高興，搞到狂流口水，Steven親自為牠抹口水之餘，更肉緊地輕咬愛犬耳朵，認真搞笑。
Steven說：「阿Mo好似豬，閹咗之後愈嚟愈肥，肚腩拖住地下行。」無獨有偶，Steven也愈來愈肥，一樣肚凸凸，他聞言只扁嘴苦笑，又說：「我成日都咬佢，每次帶完佢出街就㩒吓佢胳肋底，啲蝨會匿喺度，我會捉啲蝨出嚟㩒扁佢。我由細到大見阿媽都係幫屋企隻斑點狗捉蝨，我幫阿Mo沖涼、剪毛，你親自照顧佢，佢會對你好啲。」
「好似女朋友」
Steven續說：「我覺得唔應該當佢係寵物，要當佢係屋企人，我夜晚攬住佢一齊瞓，佢又會將個頭挨喺我胳肋底，對眼望住我瞓，好似女朋友咁。我唔帶佢出街，廁所一定有一兩嚿嘢喺度；我打機，佢就坐上我大髀；我睇VCD，佢就坐埋喺梳化，你去邊就跟住去邊，好鬼黐人。」
採訪：朱倬誼
攝影：陳慧安
