鍾鎮濤（阿B）自言在○五年最大得着是組band成功，他的新band樂飛共有五人，隊員有郵差、唱片監製，甚至退休唱片公司高層，阿B謂夾band讓他興奮得睡不着覺，不過溫拿對他來說依然重要，明年破產令結束後，即會舉行溫拿演唱會。
二○○五年快將過去，鍾鎮濤總結今年的苦與樂說：「對我嚟講𠵱家嘅工作冇乜得失可言，因為我唔係為興趣工作，認真去完成就算，帶畀我最大快樂嘅都係音樂，今年最大得着就係組band成功。」
溫拿現已很少齊人聚頭，但阿B仍對夾band情有獨鍾，他今年努力籌組的新band樂飛，早前終集齊樂手，連帶擔任主音結他手的阿B共五名成員，阿B說：「有前新力唱片高層TonyLee彈結他、唱片監製楊喬興彈bass，佢哋兩個都退咗休。」
練歌興奮至失眠
阿B續說：「成員重有兩個細路，一個正職做郵差嘅，叫阿輝，佢之前幫恭碩良打鼓，我見佢好有power，搵咗佢嚟夾band，重有位Michael仔，彈keyboard，佢好犀利，一個人彈，你以為係幾個人彈緊。」
阿B謂有時他登台接騷，也會帶着樂飛同往，他說：「我有次練完歌，返到屋企眼光光，到天光都瞓唔着，因為好耐未試過有咁好玩、咁得心應手嘅band，搞到要食半粒安眠藥先瞓到覺。」
嚴選有型結他手
阿B表示很想多找一個會唱歌的結他手加入，他謂：「加埋我兩個主音結他手。有乜嘢條件？彈得、唱得、有台型又啱key囉，好似黃貫中、彭健新咁嘅款就perfect。」
不過溫拿在阿B心目中同樣重要，明年十月阿B便結束其破產生涯，之後便會立即舉行溫拿演唱會，阿B說：「溫拿係我人生中經歷過嘅一個重要階段之一，冇嘢可以代替到。」
採訪：蔡如玉
攝影：陳慧安
