韓民示威激激哋，港股則好好哋。恒指高開39點之後，反跌75點，形勢睇嚟麻麻，好友以為又一鋪，埋單有33點進帳。日股散314點，港股冇受拖累。短期形勢，有利揸C輪多過揸P輪。
新地C輪9059：領匯（823）上到15元，再升0.45元，創新高。REITs紅紅火火，似乎冇乜人留意新地（016）嘅REITs概念。新地去年租金收入高達50.56億元，冇間公司夠佢多，新地如果搞REITs，係咁意執幾件投資物業出嚟，已可成事。冇乜人提過嘅概念，一旦彈出，刺激作用會好厲害。
新地昨升15仙，熱門C輪9059跌1仙，最值得短炒。隻輪明年4月初夠鐘，輪價32仙，溢價4.7%，槓桿率23.3倍（有效11.9倍），引伸波幅20.5%。趣趣哋，正股起2元計，隻輪理論升幅10仙，升幅已經係31%。
滙控C輪4907：滙控（005）喺最後10分鐘，成73萬股，佔全日成交9%，剔上125.40元，升0.70元，大隻銀彈掟落去，個勢繼續去。周一推介嘅C輪4907，收37.5仙，升2.5仙，按公式計，理論升幅4仙。隻輪明年4月初夠鐘，溢價得1.1%，槓桿率33.4倍（有效19.9倍），引伸波幅10.9%，數據靚絕。
章盛