世貿會議在香港召開，好多報紙發表評論，睇落只有《蘋果日報》社論嘅觀點最堅定、最清晰，就係堅決擁護自由貿易，反對反世貿。《蘋果日報》社論素來支持爭取普選，爭取民主。老實講，民主與自由貿易手牽手，如果一方面講民主，另一方面講反世貿，支持保護主義，恐怕係精神分裂。西方國家就有好多呢類人。
從香港人嘅角度睇，香港就係自由貿易嘅最大得益者，香港素來係自由港，對外國產品不設貿易障礙，不設關稅，香港當然亦希望世界各國對香港貨同樣對待，經多年談判，歐美卒之自二○○五年度起取消咗紡織品配額，香港紡織界大蒙其利。香港人得益於世貿組織，為何香港人要反世貿？
一啲自以為具備國際視野，實則只聽一面之詞嘅社會主義傾向人士講，我哋要同情貧窮國家工人、農民，因佢哋受到大國、大企業嘅壓榨、剝削，世貿就係大國大企業幫兇。呢樣係攞嚟講，請問四川農民到東莞賺六百至一千元（人民幣）月薪，好唔好？是否好過佢哋留在家鄉賺一百至二百元人民幣月薪，甚至乎幾十元？四川農民是否因此改善了生活，還是原地踏步，一貫貧窮？如果你話，東莞資本家係剝削噃，四川工人在東莞工作，應攞月薪六千元港紙，與香港看齊至啱，講笑咩，如果如此，邊度有咁多人去東莞投資呀，唔該學吓西方資本主義經濟學，唔好掛住食馬克思主義者嘅口水。
又有人講，反對大國農業補貼，啱嘅，確係要反對，但點樣反對呀？南韓農民去巴黎大示威，與法國農民大決鬥呀？最實際方法就係透過多邊談判，在世貿框架內與發達國家談判，鬥耐性，逐步蠶食，如果反對世貿，打爛世貿架構，你估法國農民會自動向南韓農民奉獻咩，你估中國農民有力迫使美國農民放棄棉花補貼咩？反世貿之人，請用吓腦袋。