噚日班泛民中幾個孤軍作戰嘅一票議員開會，周街傳以為係轉軚大會，因為冇叫白鴿黨同大狀黨，後來先知牽頭人大嚿陳偉業叫埋郭家麒同張超雄等九個同事，排排坐想傾吓喺政改以外，大家可以點樣加強聯繫，真係虛驚一場。
大嚿會後話，只係傾吓將來點合作，郭醫生則話，大家諗到有時未必熟悉所有範疇嘅嘢，所以想定期坐埋，交換專業意見，例如佢講吓醫療嘅嘢，張超雄解釋吓社福政策。大家重約定一月十一日再碰頭㖭。
「一票議員」因為冇黨冇派，一個人要理晒所有問題，變成周身刀，冇張利，搞聯盟好正路。數埋數埋，泛民內一票議員多達十一個，勢力不容忽視。
鄭大班噚日冇露面，有人傳大嚿企梗，煲呔搞掂咗李國麟，所以唔再係「大石班」有機會轉軚，而係變成「石班麟」（石即劉千石），大班就矢口否認會轉，而麟哥話煲呔未搵佢傾，要轉除非有時間表啦！
爆料熱線：29290000、27860099
報料傳真：26239278
報料電郵：[email protected]