MC6總算平平安安開咗幕，啲世界級嘅示威人士真係有諗頭，又搶盾牌、又跳海、又瞓街，總之一定有畫面，電視直播精采，相片亦豐富，因為咁樣先至可以引起全世界關注，上到頭版。
辛苦咗成日，終於都可以慢慢睇吓「成績」，噚日八方喺請願人士隊伍中，就見到唔少南韓農民攞住啲香港報紙，睇吓報道如何，或者睇吓自己有冇見報都唔定。香港人肯定大部份唔識韓文啫，但係佢哋反而會識啲中文喎。大長今讀嘅醫書都係用漢字寫嘅。
今次世貿會議，經濟損失都唔少，唔知有冇商舖要煲呔賠錢？當然你可以話香港都要負啲國際責任，但係要小市民負就未必講得過去。警隊嘅表現都好唔錯㗎喇，前日下晝一見勢色唔對，就馬上叫會展附近嘅上班一族疏散，搞到好多人提早一小時放工，車就冇得揸走，只好乘坐公共交通工具撤退。
爆料熱線：29290000、27860099
報料傳真：26239278
報料電郵：[email protected]