滙豐大班鄭海泉噚日再獲公開大學頒發榮譽工商管理博士學位，佢今個月8號先至獲中大頒發榮譽社會科學博士學位，前後才一個禮拜就攞咗兩個博士，反映香港院校真係好難搵人！但鄭大班冇受邊際效應下降影響，一樣笑到見牙唔見眼，佢同華華講，囡囡考緊試無到，但太太就有嚟。
噚日滙豐跟隨美國，加息１/４厘，鄭海泉就話，供樓人士負擔就梗係重咗，明年首季，息口重會有半厘升幅㖭，但佢相信會見頂！
講到近日熱門話題WTO，大班就話自由貿易對香港好重要，但農民嘅收入又確係偏低，所以希望今次嘅會議點都傾到啲成果出嚟啦！
除咗鄭海泉之外，寫《紅高粱家族》嘅莫言亦獲頒榮譽文學博士，泰國「遙距教育之父」威杰．施里薩安獲榮譽理學博士，前中國財長項懷誠就獲榮譽社會科學博士銜，全部由校董會主席李業廣「扑頭」頒授。
有「平民高官」之稱，現職全國社會保障基金理事會理事長嘅項懷誠，一見到記者就笑笑口打招呼，重話嚟咗香港5日，會喺今日去雲南，參加當地慈善活動。至於大家關心嘅社保基金，佢就話會將香港作為對外投資平台，投資額介乎8至10億美元，邊度好就投資邊度咁話。
李華華