「金曲情牽半世紀」演唱會周日便圓滿結束，有昔日「煇黃演唱會」的演出班底，也有顧嘉煇和黃霑這對金牌拍檔合力炮製的經典金曲，但再聽不到霑叔豪邁奔放的笑聲。霑叔去年病逝，煇哥又因身體不適而辭演，迫使主辦單位把原來紀念煇哥入行五十年的演唱會，變成一個懷舊金曲派對。儘管霑叔已離開我們，但每當鄭少秋和鍾鎮濤等獻唱霑叔的作品時，總不期然勾起對霑叔的懷念。
鍾鎮濤：佢令我感動
「上兩次做霑叔演唱會嘉賓，都係我嘅人生轉捩點，一次係離婚，一次係破產，令我深深體會到乜嘢係人情冷暖。記得破產之後，霑叔打電話畀我，話佢開演唱會，叫我嚟玩吓。霑叔見到我就話：『得㗎啦，乜你都唔使講！』我就唱咗首《今天我非常寂寞》。雖然霑叔乜都冇講，但佢所做嘅一切已經令我好感動。」
葉振棠：難忘幽默感
「記得有次煇黃綵排時，霑叔拉我坐喺觀眾席，話想同我開玩笑，因為當年我嘅視力有問題，霑叔就問我：『如果我將你扮成《小飛俠》裏面嗰個獨眼龍船長好唔好？』最終我戴埋獨眼龍個眼罩出場。
有時見佢好似大癲大肺，其實佢做每一件事都好認真。今次演唱會冇咗霑叔，感覺上好似欠缺咗啲嘢咁，例如佢豪邁奔放嘅笑聲，間唔中一兩句嘅三字經。」
關菊英：同煇黃無緣
「今次係我第一次返出嚟做騷，記得第二次煇黃嗰陣，煇哥有搵我做嘉賓，但我覺得自己未ready，拒絕咗佢。
點知呢次到我答應，霑叔就走咗，煇哥又因為有病做唔到，同佢哋好似好冇緣咁，真係覺得好可惜。」
仙杜拉：聽唔到笑話
「冇咗霑叔喺度，聽唔到佢啲有味笑話同三字經，真係好唔慣，好miss佢！我哋呢班歌手平時各有各忙，係霑叔同煇哥令我哋成班老友聚埋一齊。每次做煇黃都有個規矩，就係大家約定喺後台着睡衣或者浴袍，貪化妝梳頭嗰陣唔怕整污糟件衫。」
葉麗儀：靚詞易上口
「霑叔填嘅歌詞好靚、好容易上口，每次邊一個出去唱，其他人都會喺後台跟住唱。除咗霑叔寫得一首首好詞畀我唱之外，我更加要多謝煇哥，當年我參加《聲寶之夜》爆晒燈（獲得最高評分），係煇哥做評判，所以冇煇哥就冇葉麗儀。」
鄭少秋：博學有性格
「每次唱霑叔嘅歌，都會勾起我對佢嘅懷念，諗起佢廣闊嘅胸襟同音樂才華。當年我做和音嗰陣已經認識霑叔，當時覺得佢講嘢大大聲好誇張，後來先知佢原來咁博學，佢寫好咗嘅歌詞點都唔肯改，好有性格。」
採訪：戴彩煥 攝影：葉君海
