尖嘴九龍公園有兩棵逾百年老樹無喇喇死咗，意頭就一啲都唔好啦，邊有「國際城市」會有香港啲公園咁種死啲樹嘅奇聞，重係百幾歲老樹㖭，如果喺紐約倫敦過百歲樹無端端死咗會好大件事，上街示威搞公聽會都有份。
呢啲城市都有保護老樹法例㗎，香港話自己係亞洲國際都會㖭，但係就無一套完整嘅樹木法，搞到可以無法無天咁殺死啲樹，你咪以為樹種係康文署，咁樹嘅政策係肥平管，原來香港種樹政策係亞冬冬管，咁即係好似可加可減嘅機制咁囉，冇王管呀，我睇我哋都要搵阿人龍王開過個樹木死因庭，審吓點解香港過去幾年有成幾十棵老樹無端端死咗。
城市規劃重差過深圳
嘻嘻，主教陳話要有普選時間表，我阿怪士就話應該要求整番個全港種樹時間表，再嚟藍圖，實際過喺度吹普選時間表喇。老實講普選可以幾時選都得，但係樹死咗就種唔番吖嘛，念幾千次天主經聖母經都冇用，老樹都唔會生番喇，遲多幾年，香港市區都係好大可能冇晒啲老樹，咁香港叫鬼國際城市咩，到時重衰過深圳二十年前。
係呀，呢幾年香港啲地產佬設計同政府樓，都係學緊八十年代深圳，一味得個大，密麻麻，香港人成日都話香港好掂，失敗都係由自滿開始呀，上個禮拜，深圳市政府搞咗個大型城市規劃展覽，好掂㗎，搵咗麻省理工建築系主任，張永和教授策劃，好多嘢睇，唔係好似香港買樓咁，一味豪，暴發嘢，多啲討論吓城市設計唔同嘅模式，深圳舊區就係反面教材，呢幾年啲新區設計得幾好，又種好多樹，住喺度心情都好啲啦。