冠捷（903）周二曾大跌5%，噚日則大升5%，何解咁飄忽？
原來台灣方面有報道，冠捷主要客戶兼主要股東飛利浦，將部份LCD電視機生產定單外判畀台灣的製造商，市場自然擔心冠捷定單從此流失，股價應聲插水。其後澄清今次係冠捷嫌定單數量唔大，加上在大陸製造輸往台灣的關稅又高，所以拒絕接單，而不是定單被搶走，即係話今次班大戶沽錯咗。
冠捷一向是基金愛股，消息一澄清，芬佬隨即入市掃平貨，收報7.35元，升5%，成交達4315萬元。
黑客話，冠捷買咗飛利浦的電視生產業務後，獲得優先接單權（即係話要先畀單冠捷，待冠捷唔肯接，才外判予其他生產商）呢件事，班芬佬冇理由唔知道，竟然會誤信傳聞而沽貨，的確有啲奇。其實，冠捷由5元水平起步炒上，累積升幅近50%，如今年結在即，有芬佬借消息沽貨鎖定利潤亦好正常。
敏實有高手撐場
敏實（425）招股時認購反應唔算好理想，公開發售及配售部份分別獲8.21倍及9倍認購，僅能以中間價2.25元定價，但12月1日上市最低都有2.775元，其後在成交量唔算太多嘅情況下，炒高至3.425元，噚日收報3.25元，較招股價高44.44%。
唔少人都覺得敏實背後有高手撐場，原來敏實除咗有霸菱呢個基金股東持10.84%外，高盛亦申報持股5.25%，大家應該明白點解敏實可以咁強啦。
內蒙發展（279）配股後愈跌愈深，令人心寒。噚日尾段再瀉27.5%至0.25元，成交高達1048萬元。該股12月1日停牌，12月7日的復牌通告公布，以每股0.67元配售4400萬股，點知一復牌已插破0.50元水平，完全反彈乏力，唔知內情，咪亂咁博反彈。
阿虎