領匯真係煞氣大，碰親都一身蟻。今日立法會財委會就鄭明訓戴兩頂帽──做領匯主席又做德銀顧問──一事開會，鄭主席相信有排解釋，好彩世貿搶晒鏡頭，如果唔係重杰。
除咗鄭明訓，上一任主席王冬勝亦坐唔耐，佢兼咗呢份職之後就同渣打反枱，轉投滙豐，正正因為有利益衝突要辭去領匯主席。（其實有王冬勝先例，唔明點解房委會覺得鄭明訓冇問題？）
重有係梁展文，佢上一年臨門失機，仕途大受影響，否則特首辦主任都有得做。今年搞番掂領匯，以為食尾胡，誰知又爆一單嘉亨灣，又係因為戴兩頂帽惹起風波。還有李鴻鈞，佢係領匯首任CFO。佢本來係恒隆財務總監，諗住去領匯只一人之下，可以大展拳腳，點知上唔到市又有人事問題，結果黯然而去。
至於鄭經翰，亦係領匯受害人，去年佢反領匯私有搞到失控，後來雖然阻到上市，但代價沉重，只可以講係慘勝。而董建華呢，八萬五都冇事，竟然衰喺一個小小房地產信託基金之上，你話係咪邪？
唯一頂得住領匯煞氣嘅，目前只睇到一個蘇慶和。佢勝在EQ高，激極都唔嬲，你搞監察組織，佢重笑笑口叫人做紀念品不妨做隻表──叫做LinkWatch！
李華華